देश-सम्मानमा !

ज्यान पो रोगी भएको हो त !

मन-मस्तिष्क त शतप्रतिशत रोगी छैन 

त्यसो हुनाले यी हरफहरू 

देश-सम्मानमा !

देश बिग्रियो भन्छौँ सबै 

सपार्ने साहस गरौँ न 

लोभ र लालच स्वार्थलाई 

नकार्ने साहस गरौँ न 

सुधार्नु पर्ने देश हो कि मान्छेले आफ्नो आचरण 

उधार्नु पर्ने दोष हो कि दम्भको ओढ्नू आवरण 

देश सिद्धियो भन्छौँ सबै 

ब्युँझने साहस गरौँ न 

लोभ र लालच स्वार्थलाई 

नकार्ने साहस गरौँ न 

उठाउनु पर्ने देश हो कि मान्छेले आफ्नो महल हो

छुटाउनु पर्ने दोष हो कि अँध्यारो पोख्ने पहल हो 

देश रित्तियो भन्छौँ सबै 

फर्कने साहस गरौँ न

लोभ र लालच स्वार्थलाई 

नकार्ने साहस गरौँ न ।

टीका चाम्लिङ

रचनाकाल: १६ भदौ, २०८२ भक्तपुर ।